الناشط اللبناني “عباس زهري” يقصف جبهات الزبائن وأصحاب المطاعم معاً | ودروس في اتيكيت الافطار في المطاعم 

(ملاحظة هذا البوست لايقصد اي مطعم اشتغلت فيه انما مجرد تجربة ٣٣ سنة راحت من عمري وانا اعمل بهذة المصلحة)

بما انه هيدي اول سنة بيمرق شهر رمضان وما بكون عم بشتغل فيها بمطعم في بوست صرلي من لما فتحت الفيسبوك ناطر لاكتبه ، بس لاني كنت بشتغل ب المطاعم ما كنت قادر اكتبه وهلق صار فيني فش خلقي :

( ملاحظة يمكن يمرق كم مسبة مش عارف اذا رح يرتفع الدوز عندي انا وعم بكتبه فنرجو من المؤمنين الاتقياء عدم قراءة البوست ) 

– اول شي لما تنقبر تجي بلا حجز ما تتخلق ع سمانا مش مشكلتي انك جاي من اخر الدنيا عشان تاكل عنا وبدك تربحني جميلة وتوقف ع الباب وتجعر وتعلي صوتك وانا مقبور احترمك لانو شغلتي بس لو القرار بأيدي كنت دعوستك ، المطعم مليان وين بقعدك ؟ بفرشلك ع الارض حصيرة 

– لما تحجز طاولة ل ١٠ اشخاص وتنقبر تجي ٦ انو شو يابا انت البندوق يلي قدرت تاخذ طاولة كبيرة وعددكم قليل عشان لما تفحش وتهجم ع البوفيه تقدر الطاولة تساع صحون اكثر وطبعا مش رح تاكلهم كلهم بس هيك محن 

– لما تكون حاجز طاولة ل ٦ اشخاص وتجوا ١٢ واحد والمطعم مليان لا تتخلق على سمانا انو نحنا من الساعة ١٢ الضهر عم نرتب الحجوزات وحضرتك جايي قبل الاذان ب ٥ دقايق بدك ياني اخلق لك كرسي وطاولة وهوي اصلا ما في محل لواحد يمرق بين الطاولات 

– البوفيه هوي عبارة عن عدة انواع ب الاكل مش عبارة عن مسابقة مين بيقدر يعبي اكبر كمية اكل 

– انقبر احترم الدور لما تكون واقف ع البوفيه لانه الناس يلي واقفة ب الصف كمان صايمة مثلك ولما الموظف يقول لك استاذ معليش ما تجي من ورا البوفيه لانه بس مخصصة للموظفين ما تدفشه بأيدك لانه لو الموضوع راجع الي كنت لبست الطنجرة براسك 

– ما تعبي صحن الحلو قبل الاكل مش سباق هوي 

– شو بتحس لما الطاولة عندك فيها اكل بيكفي ل ٢٠ شخص وانتو ٥ اشخاص وفي ناس وصلت متأخرة وما لاقت اكل كرمال واحد فجعان مثلك مش شايف اكل بحياته ،

– لما نقول بوفيه مفتوح بسعر معين كون اكيد انو نحنا بنحسب السعر بمعدل كمية الاكل يلي بياكلها الانسان الطبيعي لو عارفين انو الزباين مثل حضرتك فجعانة كون اكيد انو كنا سعرنا البوفيه بأغلى من هيك بكثير 

– لا تتخلق ع الموظف لانه صايم مثلك بس انت فطرت وهوي ممكن يفطر بعد الاذان ب ٤ ساعات ف فشخرتك قدام الناس يلي عازمهم ما تطلعها ع موظف مسكين 

– يا خرا ما تهرب بدون ما تدفع لانه الموظف المسكين رح يتحمل فاتورتك يا بلا اخلاق 

– لما تفوت ع الحمام لتتوضى مش ضروري يلي يفوت من بعدك يحس انو في قسطل مي انفجر ب الحمام ، اذا كنت كثير بتسرف ب المي اثنااء الوضوع معليش مرقها بهيدا النهار مش رح تفوت ع النار لانك ما وصلت المي للسقف